A raíña Letizia presidiu este venres na Coruña o acto de proclamación do Premio Fundación Princesa de Xirona na categoría Social 2020, que recaeu no enxeñeiro madrileño Guillermo Martínez, que fabrica próteses 3D para persoas con escasos recursos.
Fíxoo nun acto onde estivo acompañada polo vicepresidente segundo e ministro de Dereitos Sociais e Axenda 2030, Pablo Iglesias, que se estreou este venres como ministro de xornada acompañando a raíña.
Acompañados do presidente da Xunta, Alberto Núñez Feijóo, e da alcaldesa da Coruña, Inés Rey, antes de que se dese a coñecer o nome do premiado, visitaron a actividade que tivo lugar con 250 mozos galegos, que participaron nun reto emprendedor.
O acto, celebrado no Centro Ágora, foi a segunda parada dunha xira que realiza a Fundación para anunciar os premiados en diferentes categorías pola súa traxectoria e compromiso coa sociedade.