Durante o ano 2021 a sociedade e as empresas galegas experimentaron un importante avance na súa dixitalización, segundo despréndese do informe sobre a Sociedade Dixital en España 2022, que fixo público estes días a Fundación Telefónica.
A porcentaxe da poboación galega que usou algunha vez internet creceu 3,6 puntos, ata situarse no 92,4%, e a porcentaxe da poboación galega que se conecta a Internet varias veces ao día alcanzou o 85,4%, cifra que se eleva ao 96,6% cando se trata de cuantificar os residentes en Galicia que se conectan a Internet polo menos unha vez á semana, o que practicamente iguala á media da UE (98 %).
O maior uso que se lle dá á rede entre os galegos é para a mensaxería instantánea (o 85,1% da poboación utilízaa), aínda que en 2021 rexistrouse un crecemento significativo noutras utilidades, como a de concertar citas médicas (crece 10 puntos, ata o 51%), vender bens ou servizos por Internet (aumenta 7,5 puntos, ata o 17,9%) ou o correo electrónico (crece 7 puntos, ata alcanzar o 74,8 %). O uso da internet dispárase, ademais, cando se trata dos máis novos, chegando ao 44,8% a porcentaxe de menores entre 6 e 15 anos que realizou actividades escolares ou asistido a clase por vía telemática.
Outro incremento importante entre a poboación prodúcese no consumo vía Internet. A porcentaxe de persoas en Galicia que compraron algunha vez por Internet creceu 10 puntos, ata o 68 %. Destas, o 73,4% adquiriron roupa, zapatos e accesorios, o que supón un crecemento de 15 puntos sobre 2020 e demostra que se mantén unha importante inercia postpandemia no crecemento do uso da internet en xeral, e no do comercio electrónico en particular. O segundo grupo de compra son os pedidos de comida a restaurantes, cun incremento de 15 puntos, ata alcanzar ao 35,7% da poboación galega, e tamén se incrementaron as descargas e as subscricións a música en streaming, das que fai uso o 23,5% da poboación.
Tamén aumenta de forma considerable a relación dos cidadáns coas administracións vía telemática. A porcentaxe de persoas que tiveron algún tipo de interacción coas administracións a través de Internet creceu un 6,6%, ata o 64,5%. O motivo máis común é a procura de información nas páxinas web das administracións (crece 7,5 puntos ata o 53,5%).
Promoción das empresas a través de Internet
Respecto a as microempresas galegas (as de menos de 10 empregados), o aspecto máis destacado do informe é o aumento en 7,4 puntos (ata alcanzar o 40,2%) das que utilizan as redes sociais para a súa promoción, o cal supera a media nacional española, do 36,3 %. Pola súa banda, as empresas de maior tamaño reduciron a súa aposta polas páxinas web (descende 3,8 puntos as que contan con ela, ata o 77%) e en cambio aumentan a aposta polas redes sociais, utilizadas polo 86% delas.
O informe reflicte tamén que en 2021 o 45,3% das empresas galegas permitía a modalidade de teletraballo entre os seus empregados, e máis da metade deste grupo comezara a aplicalo tras o COVID. O 36,7% das empresas galegas recoñeceu que a porcentaxe dos seus empregados en teletraballo crecera como consecuencia da pandemia.
Por último, e en relación ao despregamento de infraestruturas de comunicación, no conxunto de España o informe sinala que a tecnoloxía 5G xerará investimentos por valor de máis de 5.000 millóns de euros e a creación de máis de 300.000 empregos, segundo a estratexia España Dixital 2025. Ademais, perfílase como unha ferramenta clave para a sustentabilidade ambiental.