- Máis de 1700 manifestacións están convocadas en todo o mundo
A tres días para o cume pola Acción Climática da ONU en Nova York, son centos de miles as persoas que se están manifestando por todo o mundo para esixir medidas urxentes e lograr paliar os efectos do cambio climático. Todas estas protestas forman parte da ‘Global Climate Strike’, na que durante unha semana haberá mobilizacións e máis de 3.500 accións a nivel global.
O cume, que se celebrará o vindeiro luns 23, chega tras un ano no que se bateron récords absolutos de temperaturas especialmente durante o verán do hemisferio norte, e con especial relevancia no Ártico; e tamén despois dunha onda de incendios sen precedentes na selva amazónica.
Desde a ONU alertan de que estamos ante unha emerxencia climática e de que é totalmente necesario actuar de forma inmediata.
Durante este venres celebráronse manifestacións en países como Australia, Tailandia, India, Singapura, Nixeria, Uganda, Sudáfrica, Turquía, Reino Unido, Francia, Austria, Ucraína, Polonia, Dinamarca, Noruega, Finlandia ou Suecia, entre outros moitos países.
En Alemaña decenas de miles de asistentes acudiron aos máis de 550 actos convocados por todo o país. Esta acción coincide co anuncio do Executivo de Angela Merkel dun ambicioso plan contra o cambio climático no que prevé mobilizar 40.000 millóns de euros ata 2023 para reformar os sectores do transporte, a agricultura ou a vivenda.
En Polonia tamén demandaron un cambio radical ao seu Goberno. O seu país depende nun 80% dos combustibles fósiles.
«Din que se están ocupando da sorte dos granxeiros, dos mineiros e de familias que teñen moitos fillos. Sabemos a través de fontes científicas que a crise climática afectaralles primeiro», afirma unha das manifestantes en Polonia.
En España tamén houbo protestas en Madrid ou Valencia, pero a manifestación principal celebrarase o vindeiro venres 27.
Fonte: Euronews