Para sufocar a crise económica provocada polo coronavirus, a Unión Europea adoptou este martes un fondo de 100.000 millóns de euros en préstamos, coñecido en Bruxelas coas siglas SURE, do inglés ‘ Support to mitigate unemployment risks in case of emergency’, apoio para mitigar o risco de desemprego en caso de emerxencia. Con el, aqueles gobernos que poidan demostrar un incremento do gasto público por mor da pandemia, poderán financiar os seus sistemas de protección de emprego, baixo termos moi favorables.
Desde o inicio da crise, máis de 40 millóns de traballadores en chan comunitario víronse obrigados a reducir a súa xornada laboral ou a someterse a diferentes esquemas de redución de emprego como os ERTE. A porcentaxe varía en cada país. Mentres que en Francia é do 47,8%, en Alemaña é dun 26,9% e en España dun 24,1%. Este fondo, que se asenta sobre o principio de solidariedade comunitaria, deseñouse para evitar os despedimentos e apoiar ás empresas a que poidan pagar os salarios dos traballadores durante a crise.