Os líderes da UE, reunidos a través dunha videoconferencia, acordaron un paquete de medidas para protexer a economía dos efectos do coronavirus. A medida chega despois de días de críticas ao non lograr acordar medidas conxuntas. A presidenta da Comisión, Ursula von der Leyen, asegurou que haberá un fondo de investimento para apoiar a saúde, o emprego e as pequenas empresas. «Será un gran investimento e alcanzará 25.000 millóns de euros rapidamente. Para logralo, propoñerei, esta semana, ao Consello e ao Parlamento liberar 7.500 millóns de euros de liquidez de investimento. Establecerei un grupo de traballo conxuntamente cos estados membros para asegurar que o diñeiro comece a fluír nas próximas semanas», asegurou Von der Leyen.
Ademais de limitar a propagación do virus, os países membros designaron outras prioridades como previr a escaseza de máscaras e respiradores, a procura dunha vacina e tratar as consecuencias sociais e económicas. Pola súa banda, Charles Michel, presidente do Consello Europeo apuntou que a prioridade é a saúde. «Limitar a propagación do virus é a prioridade: os estados membros estamos de acordo en que a prioridade é a saúde dos nosos cidadáns, e que as medidas que se teñen que basear no asesoramento médico e científico, deben ser proporcionais para que non teñan consecuencias excesivas para o conxunto da nosa sociedade». Ata o de agora, as respostas á epidemia na Unión Europea foron moi variadas, desde o confinamento en Italia e a prohibición de grandes reunións en Francia, ata pouco máis que o asesoramento en materia de saúde pública nalgúns países.