Os Estados membro da Unión Europea decidiron aprazar a votación dun asunto cada vez máis controvertido: ratificar ou non a prohibición en todo o bloque, a partir de 2035, da venda de vehículos novos con motor de combustión. O aprazamento reflicte sen dúbida o crecente descontento ante unha das medidas centrais para lograr a neutralidade climática a mediados de século.
A prohibición deseñouse inicialmente como unha transición gradual, propoñendo que todos os coches e furgonetas novos que se vendan no mercado da Unión a partir de 2035 teñan unha redución do 100% das emisións de CO2. Unha disposición que excluiría por tanto a todos os que funcionen con gasolina e diésel.
Bruxelas elixiu 2035 como data límites porque a vida media dos vehículos é de 15 anos, e o Green Deal pretende que toda a economía sexa neutra en emisións de CO2 para 2050.
Supoñíase que a votación do venres dos embaixadores da Unión Europea non era senón unha mera formalidade, despois de que os dous colegisladores do bloque, o Consello da Unión e o Parlamento Europeo, alcanzasen en outubro un acordo provisional que mantiña intacta a data límite de 2035.