Tras a chegada da resposta iraniana á proposta da Unión Europea de resucitar o acordo internacional sobre o seu polémico programa nuclear, a Comisión Europea está a examinalo sen présa pero sen pausa. Así o indicaba a portavoz do órgano executivo da UE, Nabila Massrali: «Só podo confirmar que recibimos a resposta iraniana a pasada noite. Polo momento, estamos a estudala e estamos a consultar cos outros participantes do Plan de Acción Integral Conxunto e con Estados Unidos sobre o camiño para seguir.» Froito de anos de duras negociacións, o pacto sobre o programa nuclear iraniano pretendía disipar os temores occidentais de que o réxime dos aiatolás utilizase o seu programa nuclear como tapadeira para fabricar armas atómicas. Entrou en vigor en 2015, pero saltou polo aire 3 anos despois cando a administración Trump decidiu retirarse unilateralmente e volver impoñer sancións económicas a Teherán, que como resposta acelerou o seu programa atómico un ano despois. A chegada de Joe Biden á Casa Branca abriu unha porta á continuación do acordo. Durante os últimos 16 meses, Alemaña, Francia, Reino Unido, Rusia, China e, indirectamente, Estados Unidos tentaron negociar con Irán, sen éxito, para restablecer o acordo. Durante ese tempo, a capacidade de Irán para enriquecer uranio, o material necesario para fabricar armas atómicas, multiplicouse.
36