A Unión Europea non perdoa os atrasos de dubidosa xustificación na entrega de vacinas por parte da farmacéutica sueca AstraZeneca. Segundo anunciou este luns Bruxelas, a Comisión Europea emprendeu accións legais contra AstraZeneca, aínda que non especificou en que tribunais. Bruxelas lembra que AstraZeneca só entregou á UE 30 millóns dos 120 millóns de doses prometidos por contrato no primeiro trimestre do ano e no segundo, só prevé entregar 70 millóns dos 180 millóns comprometidos. A acción civil, pode durar varios meses durante os cales «os europeos poden pedir ou ben a rescisión do contrato por incumprimento, con danos e prexuízos, ou ben o cumprimento do contrato (as entregas), o que é pouco probable», segundo o avogado belga Arnaud Jansen. O pasado 19 de marzo, a Comisión Europea activou un procedemento de resolución de conflitos contractuais para resolver o conflito con AstraZeneca, e anunciou que aínda non activara a opción dispoñible para a UE no contrato de comprar 100 millóns de doses adicionais. O uso da vacina de AstraZeneca restrinxiuse na maioría dos países da UE debido aos rarísimos casos de tromboses que pode provocar. Dinamarca xa non a utiliza.
33