O Servizo de Microbioloxía do Hospital Álvaro Cunqueiro de Vigo confirmou este sábado a variante india en tres das cinco mostras de covid-19 recollidas entre a tripulación do barco «Prometheus Leader» amarrado no porto vigués.
É a primeira vez que se confirma en España a presenza da variante india. Son seis contaxiados, dos que catro permanecen a bordo do «Prometheus Leader» cunha clínica leve. Outras 16 persoas están en corentena no barco e non chegaron a pisar terra.
Trátase da variante B1.617 subvariante 2, que é sensible á vacina. Esta mutación é a que se fixo predominante na India en coincidencia coa forte repunta da pandemia no país asiático.
En Galicia, neste momento, o gromo estaría localizado e controlado. Ademais os dous mariñeiros hospitalizados en Vithas Fátima en Vigo permanecen estables. O resto están a bordo da embarcación e seguen asintomáticos, pero en illamento.