A Ventana de Laxe entre as salas que darán forma á Rede Galega de Música en Directo

A Ventana de Laxe.

A Rede Galega de Música ao Vivo desenvolverá a súa programación de 2020 en vinte salas privadas de toda Galicia como resultado da convocatoria de admisión posta en marcha a finais do ano pasado pola Consellería de Cultura e Turismo, a través da Axencia Galega das Industrias Culturais (Agadic).

As propias salas serán as encargadas de configurar as súas respectivas carteleiras ao abeiro deste circuíto de música en directo, financiado ao 90% pola Xunta de Galicia. O prazo de programación abrirase proximamente a partir do catálogo de propostas dos grupos e artistas inscritos a través da intranet galescena.gal ata o 31 de xaneiro.

Na relación de locais admitidos, publicada este xoves na web da Agadic, figuran catro novas incorporacións á Rede Galega de Música ao Vivo respecto a 2019: Aturuxo de Bueu, Sala Ruído de Ferrol, Sete Flores do Carballiño e Auriense de Ourense. Ademais, repite como parte do circuíto A Ventana de Laxe.

Unha comisión encargouse de valorar todas as solicitudes presentadas para elaborar a proposta de admisión de acordo cos criterios de baremación que se especificaban nas bases. Entre eles, tivéronse en conta a capacidade do local, a antigüidade, os concertos programados nos últimos dous anos e os equipamentos audiovisuais, así como o acceso ou estado do escenario e dos camerinos.

Neste circuíto, promovido pola Xunta en colaboración coas asociacións Clubtura e Músicas ao vivo, ten cabida unha ampla variedade de estilos musicais, cun gran protagonismo dos grupos galegos. Durante o ano pasado ofreceu preto de 200 concertos en 20 espazos asociados, para o que se contou cun orzamento de máis de 170.000 euros.