- As familias dos nenos e nenas que participaron nos obradoiros dos anos 2018 e 2020 poden recoller os seus exemplares na Biblioteca Rego da Balsa
Os nenos e nenas do concello de Carballo foron partícipes da iniciativa ‘A vila do mañá’, agora materializada nun libro co mesmo nome. As familias da rapazada que participou nos obradoiros dos anos 2018 e 2020 poden recoller os seus exemplares na Biblioteca Rego da Balsa.
‘A vila do mañá’ é un proxecto da arquitecta Sandra González Álvarez na que colaboran o Colexio Oficial de Arquitectos de Galicia, a Escola Técnica Superior de Arquitectura, a Asociación para a Defensa do Patrimonio Cultural Galego, Post Arquitectos e o Concello de Carballo coa intención de «estimular unha actitude crítica entre os nenos e as nenas para que comecen o seu desenvolvemento coma cidadanía activa, xa que eles e elas serán os/as responsables do Carballo do futuro», sinalan desde a Alcaldía.
O obxectivo dos obradoiros, dirixidos a nenos e nenas de 5 a 12 anos de idade, foi incluír á infancia nos procesos de construción do espazo común, partindo da cidade coma unha ferramenta educadora. Como se recolle no propio libro, o proxecto parte de tomar a vila de Carballo coma un taboleiro do xogo da oca, conformado por aqueles elementos arquitectónicos, urbanísticos, paisaxísticos, artísticos e culturais que configuran a identidade da localidade.
Na publicación tamén se fai un repaso explicativo, a través de texto e imaxes, das actividades desenvolvidas nos obradoiros celebrados do 16 ao 20 de xullo do 2018 e do 21 de decembro do 2020 ao 8 de xaneiro deste ano, este último cun formato moito máis virtual condicionado pola COVID-19.
A última parte do libro é unha reflexión da súa autora, Sandra González Álvarez, sobre a evolución de Carballo nos últimos tempos. «Penso que o traballo que se está facendo desde o Concello, facendo renacer a vila pensando nos seus cidadáns, pon a Carballo na vangarda das vilas galegas, e para a min, por conseguinte, na vangarda do urbanismo. Creo que Carballo é a vila do mañá», conclúe.