A xerente de “Suelo Empresarial del Atlántico”, Beatriz Sestayo, reuniuse en Malpica de Bergantiños con empresarios e empresarias interesadas en implantarse no polígono industrial de Buño, froito dos compromisos adquiridos o pasado mes para impulsar o parque empresarial.
A reunión, coa presenza do alcalde, Walter Pardo, membros da Corporación e do director comercial de SEA, José Rey, permitiu achegar ao sector empresarial as últimas medidas impulsadas desde o organismo, dependente do Ministerio de Transportes, que permiten ofrecer preto do 70% da superficie do polígono en condicións de alugueiro con opción a compra –Dereito de Superficie- por menos de cen euros ao mes.
Tras a reunión, xunto co delegado do Goberno en Galicia, José Miñones, e o rexedor de Malpica, a xerente de SEA coñeceu tamén as demandas do sector pesqueiro da localidade, en reunión coa Confraría de Pescadores, e algúns dos proxectos previstos pola administración local.
Dentro das medidas expostas para impulsar o polígono, no último Consello de Administración aprobouse ampliar a oferta de chan en dereito de superficie, a modo de alugueiro con opción a compra, a preto de 15.000 metros cadrados, co que se duplica a oferta existente ata o momento.
As cifras que deberían abonar os emprendedores son moi reducidas, de só 90 euros ao mes para parcelas de 1.000 metros cadrados e de 109 euros para as de ata 1.466 metros cadrados. Na modalidade de Dereito a Superficie, as empresas poden instalarse sen necesidade de afrontar o gasto da compra do chan. Así, poderían continuar nesta modalidade durante un período de ata 30 anos ou ben optar por comprar a parcela, cunha redución parcial das cantidades abonadas previamente.
“Estamos inmersos non plan de recuperación despois dunha pandemia terrible para a sociedade, polo que as administracións temos que funcionar como revulsivo, para ou que a industria, a súa dinamización e vos polígonos empresariais supoñen un piar fundamental para a creación de emprego”, resaltou Beatriz Sestayo.
A xerente de SEA lembrou que este ano se impulsou a creación de preto de 1.000 empregos, con operacións pechadas en só seis meses con ata 26 compañías, o triplo que o ano anterior. “Queremos seguir sendo proactivos na industria e que mellor sitio que Malpica, en Malpica hai actividades pesqueiras e auxiliares que poden atopar un bo lugar no polígono”, incidiu.