A obra, que ten un prazo de execución de seis meses, suporá a reurbanización de todo o entorno e a mellora dos sistemas do subsolo.
A Xunta de Goberno local da Coruña adxudicou este venres o contrato para a construción dunha glorieta na confluencia das rúas Ramón y Cajal, Salgado Torres, Pérez Ardá e Fernández Latorre, unha zona de vertebración e confluencia de diferentes tráficos, tanto peonil como vehículos e bicicletas, na que tamén se realizarán traballos de reurbanización e melloras nos sistemas de recollida de augas no subsolo. O proceso de licitación da obra rematou coa adxudicación á empresa Canarga SL dun contrato de 502.000 euros. A actuación ten un período de execución de seis meses.