Na sesión ordinaria da Xunta de Goberno Local celebrada este mércores na Laracha acordouse adxudicar tres contratos que suman un importe total de 358.000 euros.
Dous deles son para a execución de obras de mellora das infraestruturas de titularidade municipal. O de maior importe é a reforma integral da cuberta do complexo deportivo da piscina municipal, adxudicada a Construcciones López Cao, S.L. por 215.000 euros. O Concello promove a actuación ante a necesidade de mellorar a impermeabilización e a eficiencia enerxética das instalacións para ofrecer un mellor confort aos usuarios. A cuberta presenta deterioracións que están a provocar estancamentos da auga de chuvia, o que incrementa o risco de filtracións. Tamén se detectou a degradación da membrana impermeable, que non está a ofrecer de xeito óptimo a súa función protectora. Para corrixilo, o proxecto contempla a retirada de todas as capas da cuberta existente e a construción dunha nova con garantías de durabilidade e seguridade. Tamén inclúe a mellora do illamento dos falsos teitos no interior do complexo deportivo co obxectivo de optimizar a eficiencia enerxética e o confort térmico do recinto. Ademais, a nova estrutura quedará preparada con soportes específicos que permitirán o ancoraxe dunha futura instalación solar fotovoltaica, proxecto que se executará nunha fase posterior cun investimento estimado doutros 100.000 euros.
Á empresa Construcciones Ponciano Nieto, S.L. foi adxudicada a mellora da rede viaria na parroquia de Soandres que afecta a estradas de tres núcleos de poboación. Tanto no Corgo de Abaixo como na Tapia vai ser renovada a superficie de rodadura dos vehículos, incluíndo a sinalización horizontal para facilitar o tránsito e aumentar a seguridade. Na Millarada realizarase unha actuación similar e tamén será mellorada a rede de recollida de pluviais. Neste caso o investimento supera os 61.000 euros.
E tamén se adxudicou o contrato de subministro do vehículo tipo pick-up eléctrico para empregalo como punto limpo móbil, neste caso a Vehículos, Equipamientos y Carrocerías Prieto-Puga S.L. e por 82.000 euros. Este novo vehículo poderase desprazar polas trece parroquias co obxectivo de complementar os servizos que se ofrecen no punto limpo e achegalos de xeito itinerante a todos os núcleos de poboación do termo municipal, o que implicará unha significativa mellora e modernización na xestión dos residuos e, por tanto, maior eficiencia e eficacia no aspecto medioambiental.