- O vehículo, operativo dende febreiro, conta cunha previsión de recollida de 80.000 toneladas de residuos ao ano
O delegado da Xunta na provincia da Coruña, Gonzalo Trenor, achegouse este luns ata Carballo para comprobar o funcionamento do punto limpo móbil. O vehículo que se utiliza para realizar o servizo foi adquirido cunha achega da Xunta de Galicia grazas ao Fondo Europeo de Desenvolvemento Rexional, dentro do programa operativo Feder-Galicia 2014-2020, e está operativo dende o mes de febreiro. Durante a visita de Trenor asinouse o documento que completa a tramitación administrativa. No acto participaron o alcalde, Evencio Ferrero, e o concelleiro de Obras e Servizos, Luis Lamas. Tamén estiveron presentes os concelleiros do PP Antonio Domínguez e Beatriz Neira, e a xefa territorial de Medio Ambiente, Cristina Carrión.
A adquisición do vehículo supuxo un investimento de 63.000 euros, dos que 56.000 proceden da achega do Feder-Galicia. Segundo as estimacións realizadas, o punto limpo móbil podería recoller unhas 80.000 toneladas de residuos. De feito, no de Carballo xestiónanse cada ano máis de 100.000 quilos de residuos e milleiros de electrodomésticos e outros obxectos voluminosos de todo tipo procedentes dos fogares carballeses.
O punto limpo carballés atópase no polígono industrial de Bértoa e está aberto ao público os xoves e sábados de 10:00 a 13:00 horas e de 16:00 a 19:00 horas. A veciñanza tamén pode facer uso do punto limpo móbil, que consiste na recollida dos residuos voluminosos nas illas de colectores previo aviso ao número de teléfono 981 754 917.