Abanca pagará un euro para comprar a rede en España do Novo Banco portugués, unha operación que, a falta das autorizacións regulatorias pertinentes, concluirá durante a segunda metade deste ano. A cantidade, que ata o de agora non se divulgou, consta nun informe da Comisión de Acompañamento de Novo Banco recollido por medios lusos, que detalla que a operación inclúe a transferencia de 10 sucursais e uns 170 traballadores en España.
Novo Banco, herdeiro do antigo Banco Espírito Santo, puxo á venda o seu negocio en España en 2020 e alcanzou un acordo con Abanca o pasado mes de abril. Con esta operación, Abanca superará os 100.000 millóns de volume de negocio e incrementará a súa posición no mercado español. Esta compra é a sexta operación corporativa de Abanca desde 2014, tras as do Banco Etcheverría, os Servizos Financeiros do Banco Popular; o Deutsche Bank PCB, o Banco Caixa Geral, tamén propiedade dunha entidade portuguesa, e Bankoa.