Trátase dun 1,3 por cento máis ca no mesmo período do ano pasado, cun nivel de rendibilidade do 10,7 por cento, segundo anunciou en conferencia de prensa o presidente da entidade, Juan Carlos Escotet.
O balance da entidade neste «semestre histórico», en palabras de Escotet, recolle por primeira vez o efecto da integración de Deutsche Bank PCB Portugal, e sitúa o seu volume de negocio nos 78.661 millóns de euros, un crecemento do 13,6 por cento, á espera de finalizar a integración de Banco Caixa Geral.
Escotet calculou que ao final do ano, unha vez completada a integración da entidade lusa, o volume de negocio oscilará arredor dos 85.000 millóns de euros.
O crecemento nestes seis primeiros meses do ano foi equilibrado tanto en crédito, que aumenta un 13,5 por cento ata os 32.826 millóns, como en captación de recursos, que o fai nun 14,3 por cento ata os 44.515 millóns.
Escotet destacou o dinamismo da actividade crediticia coas pemes e autónomos (cun crecemento do 6,4 por cento en novas formalizacións) e do negocio de seguros (7,4 por cento), dous dos piares do plan estratéxico que Abanca está desenvolvendo. Ademáis un dos fitos máis importantes deste período foi a alianza con Credit Agricole Assurnces, que permitirá afianzar o negocio asegurador, dixo Escotet.