A concesionaria Abertis alcanzou un acordo con Rede Eléctrica (REE) para a venda do 89,7% do operador de satélites Hispasat por 949 millóns de euros. “Esta adquisición será financiada con débeda externa e, por tanto, sen recurso ao accionista”, explica REE no seu comunicado remitido á Comisión Nacional do Mercado de Valores (CNMV). Pola súa banda, Abertis explica que ten previsto destinar o importe neto obtido con esta desinversión a repagar parcialmente o tramo de financiamento a curto prazo vinculado a desinversions da débeda de adquisición da concesionaria. O peche da operación, que está suxeito á aprobación por parte do Consello de Ministros, as autoridades de competencia en España e Portugal, así como outras autorizacións habituais de reguladores, espérase durante o primeiro semestre de 2019.