O prazo de presentación de solicitudes abrangue desde este martes 15 de febreiro ata o 7 de marzo. As persoas interesadas -que deben ser maiores de 16 anos ou facelos neste ano natural- só teñen que seleccionar o curso que desexen e cubrir a solicitude de inscrición. Calquera outra forma de presentación de solicitudes non será admisible. Por outra banda, cada persoa pode inscribirse nun único curso. Ofértanse un total 35 cursos, 27 deles en liña (que cobren os catro niveis) e oito presenciais (para os niveis 2, 3 e 4) repartidos entre as catro provincias. Todos os cursos serán impartidos entre o 21 de marzo e o 12 de maio, mentres que as probas para obter as titulacións Celga serán realizadas entre os meses de maio e xuño. Toda a información sobre horarios e localizacións dos cursos pode consultarse no Portal da Lingua Galega.