No primeiro dos casos o 112 Galicia foi coñecedor do accidente arredor das 3:30 horas deste mércores. Segundo o alertador que empregou o número único de emerxencias, un coche con dous ocupantes saírase da vía por un terraplén no quilómetro 19 da LU-546. Un dos implicados puido saír do vehículo mentres que o outro atopábase inconsciente.
Os xestores do 112 Galicia solicitaron a intervención do Servizo de Urxencias Sanitarias de Galicia-061, dos Bombeiros de Sarria e da Garda Civil de Tráfico.
Logo de chegar á zona, a dotación de bombeiros empregou o material de excarceración para liberar ao implicado. Porén, só se puido confirmar o seu falecemento. O outro ocupante foi atendido polo persoal sanitario desprazado ata o lugar.
Falece un traballador tras envorcar un camión en Marín
O accidente produciuse contra as 10 da mañán deste mércores. O 112 Galicia tivo constancia do suceso logo de que un particular informase dun camión envorcado na Escola Naval Militar. O alertador xa indicaba que o condutor podía estar falecido.
Desde a Sala de Operacións compartiuse a información co Servizo de Urxencias Sanitarias de Galicia-061, cos Bombeiros do Morrazo, coa Policía Nacional e coa Garda Civil.
Pese aos esforzos dos servizos de emerxencias, só puideron confirmar o falecemento do traballador. Os medios continúan traballando no punto para liberar á vítima, pois quedara atrapada tras envorcar o camión.