Un motorista de 27 anos perdeu a vida este domingo despois de colidir o vehículo que conducía contra un turismo na AC-422, ao seu paso por Farrapada, no concello de Dumbría.
O choque produciuse sobre as 14:00 horas, na estrada que enlaza Negreira con Berdeogas, sentido Fisterra, así o indicaba o particular que chamou ao 112 Galicia para pedir axuda.
No turismo viaxaban tres persoas, o condutor de 20 anos e dous máis, todos eles resultaron feridos leves.
Tras recibir o aviso, os profesionais do 112 Galicia alertaron aos servizos sanitarios de urxencia que, debido á gravidade das lesións, optaron por mobilizar ao helicóptero medicalizado con base en Santiago para atender ao ferido.
Desafortunadamente, pese aos esforzos dos profesionais sanitarios, tan só se puido confirmar o falecemento do motorista. Para mais desgraza o pai do finado ía detrás noutra moto.
Deste xeito, para garantir as condicións de seguridade na vía e prestar apoio ao equipo médico, desde o 112 tamén se avisou aos Bombeiros de Cee, aos axentes da Garda Civil de Tráfico e ao servizo de mantemento da vía.
