Os 27 ministros de Economía e Finanzas da UE alcanzaron este mércores un acordo político sobre as novas regras de control do déficit e da débeda, que darán aos países máis marxe para fixar o seu ritmo de axuste e inclúen requisitos mínimos de disciplina fiscal. O pacto, selado durante unha reunión por videoconferencia, foi posible despois de que Alemaña e Francia chegasen na véspera a un acordo sobre as grandes liñas da reforma do Pacto de Estabilidade e Crecemento e permite a España cumprir un dos grandes obxectivos que se marcou para a súa presidencia do Consello da Unión Europea. As novas regras manterán os límites do 3% e do 60% sobre o PIB do déficit e da débeda respectivamente. A ministra de Economía de España, Nadia Calviño, cre que «garante a redución sostida e gradual dos cocientes de déficit e débeda, cun impacto contracíclico e protexendo os investimentos públicos naqueles ámbitos prioritarios das axendas europeas: verde, dixital, social e de defensa».
52