Admitidas 1.099.687 solicitudes de voto por correo para as Eleccións Xerais do 29-N

5 minutes read

Correos admitiu 1.099.687 solicitudes de voto por correo de cidadáns e cidadás que desexan exercer por este sistema o seu dereito ao voto nas Eleccións Xerais que se celebrarán o 29 de novembro.
Das 1.099.687 solicitudes de voto por correo admitidas, 735.583 xestionáronse na rede de oficinas postais e 364.104 de forma telemática a través da web de Correos.

As solicitudes de voto por correo aumentaron un 11,47% respecto ás Eleccións Xerais do 10 de novembro de 2019 (986.446 solicitudes), a referencia comparable máis proxima por celebrarse no mesmo período do ano. Fronte ás eleccións do 23 de xullo de 2023, marcadas pola súa excepcional celebración en pleno verán e por un volume extraordinario de voto por correo, as solicitudes descenderon un 58,07% (2.622.755).

Entrega da documentación electoral
Tras comprobar a inscrición dos solicitantes no Censo, as Delegacións Provinciais da Oficina do Censo Electoral seguen remitindo os envíos coa documentación electoral (certificado de inscrición no censo, sobres e papeletas de todas as candidaturas) á dirección indicada polo elector na solicitude, con carácter certificado e urxente. O Censo ten de prazo ata o día 22 de novembro para facer entrega deses envíos a Correos, que seguirá poñéndoos ao dispor dos cidadáns a medida que os reciba.

O carteiro ou carteira de Correos realizará polo menos dous intentos de entrega desta documentación en man ao propio destinatario, deixando o aviso para que vaia recollela á súa oficina en caso de non ser posible realizar esa entrega en man. O persoal de Correos comprobará a identidade do votante mediante o DNI, pasaporte ou permiso de conducir e anotará o número do documento identificativo dando fe da recepción dos sobres e papeletas coa firma da entrega por parte do solicitante.

A data de hoxe, Correos xa puxo ao dispor dos electores 752.930 documentacións electorais para que poidan exercer o seu dereito ao voto.

No caso de que o elector non recibise a súa documentación electoral e vaia cambiar de dirección respecto á que indicou na súa solicitude, pode localizar o número de rexistro do seu envío na páxina web do Censo Electoral e solicitar a reexpedición da documentación en calquera oficina de Correos a outra dirección ou a outra oficina de Correos, con prazo suficiente para que Correos llo poida facer chegar ao novo destino.

Ese número de rexistro tamén permite ao elector comprobar a situación do envío no localizador da web de Correos www.correos.es.

Depósito do voto: ata o 26 de novembro, ás 14 horas como máximo
O solicitante ten de prazo para depositar o sobre co seu voto en calquera oficina de Correos en toda España ata o xoves, 26 de novembro, no seu horario de apertura habitual e ata as 14 horas como máximo, segundo a ampliación de prazo acordada pola Xunta Electoral Central.

Esíxese que o elector faga entrega persoal nas oficinas de Correos da documentación necesaria para exercer o voto por correo. Para iso, ao depositar o voto por correo, deberá identificarse mediante a presentación do Documento Nacional de Identidade, pasaporte ou permiso de conducir, debendo o persoal de Correos proceder á súa comprobación.

Autorización para delegar o depósito do voto
As persoas que solicitaron o voto por correo pero non poidan acudir persoalmente á oficina de Correos para depositar o voto, deberán outorgar unha autorización para que a entrega sexa realizada por outra persoa no seu nome. A autorización deberá ser asinada polo elector e acompañarse da fotocopia do seu Documento Nacional de Identidade, pasaporte ou permiso de conducir, así como da fotocopia do documento identificativo da persoa á que autoriza.

Para facilitar a redacción dese documento de autorización con todos os datos necesarios, Correos recomenda utilizar o modelo de autorización que se pode descargar na web www.correos.es.
O persoal de Correos non aceptará a entrega de documentación electoral pertencente a outro elector se non se acompaña da correspondente autorización asinada polo elector, que deberá ser conservada, onda a fotocopia do documento oficial acreditativo do elector e de quen entrega no seu nome a documentación electoral, para a súa remisión á Xunta Electoral correspondente.

Recoméndase aos cidadáns que desexen exercer o seu dereito ao voto por correo que procuren non esperar ata o último día e que aproveiten a amplitude horaria das oficinas postais para depositar o seu voto canto antes.

Tarxetas censuais e propaganda electoral
A colaboración de Correos nas eleccións a Cortes Xerais do 29 de novembro esténdese tamén á repartición das tarxetas de inscrición no censo e aos envíos de propaganda electoral, ademais do envío aos Concellos da lista do censo, a recollida de documentación o día das eleccións e o envío das comunicacións a membros das Mesas Electorais nos municipios cos que hai acordo.

Correos xa distribuíu as 35.953.542 tarxetas censuais remitidas polo Instituto Nacional de Estatística aos fogares dos cidadáns con dereito a voto o 29 de novembro, nas que figuran os datos da súa inscrición no censo, así como o colexio e a mesa de votación correspondente.

Ademais, Correos está a repartir os envíos de propaganda electoral dos diferentes partidos e coalicións que concorren aos comicios. Todas elas son obrigacións de servizo público que Correos ten encomendadas por ser o operador designado polo Estado para prestar o Servizo Postal Universal en España.

Desde a convocatoria das eleccións a Cortes Xerais, Correos está a adoptar todas as medidas organizativas necesarias para garantir o cumprimento das obrigacións que ten encomendadas durante os procesos electorais e está a poñer todos os seus recursos tecnolóxicos, loxísticos e humanos ao servizo do correcto desenvolvemento do proceso.