Estas actuacións, adxudicadas á empresa Oys Noroeste S.L.U. por un importe de preto de 50.000 euros, consistirán na disposición de luminarias no enlace e no ramal de acceso ao polígono co fin de facilitar a mobilidade nesta área industrial e mellorar a seguridade viaria.
Instalaranse 25 báculos de 10 metros de altura, con luminarias de tipo led no ramal de entrada ao polígono e dúas torres de iluminación de 18 metros de altura con catro proxectores led, na glorieta elevada de enlace coa estrada AG-55.
Estas obras realizaranse de xeito simultáneo ás de execución do acceso ao parque empresarial, cuxa finalización se prevé no mes de maio. Os traballos reactiváronse este martes coas medidas de protección recomendadas, logo de dúas semanas paralizadas polo estado de alarma reforzado decretado polo Goberno.
As obras de acceso ao polígono, cun investimento autonómico de 4,4 millóns de euros, permitirán conectar a zona empresarial de Morás coas vías de alta capacidade que a rodean, a A-6 e a AG-55, a través do novo enlace na AC-551, entre a saída da autoestrada de Carballo e a glorieta de Sabón.
As obras xa se atopan ao 95% da súa execución total, co movemento de terras, as estruturas e a drenaxe rematados. Aproveitouse o descenso da mobilidade motivado polo estado de alarma para estender a maior parte da capa de rodadura do firme, quedando pendente un treito no inicio da obra, dirección Sabón.