Na súa loita constante contra os recortes impostos pola Consellería de Educación do Goberno da Xunta de Galicia, os pais e nais do CEIP Xesús San Luís Romero de Carballo deron un paso máis na defensa da calidade educativa dos seus fillos e fillas. Este xoves, enviaron unha queixa formal ao Defensor do Pobo (a semana pasada xa presentasen unha similar ante a Valedora do Pobo), expoñendo as súas preocupacións e demandas en relación cos recortes que afectan directamente á Educación Infantil no centro educativo.
Ademais, anuncian que están en proceso de elaborar unha petición dirixida á Unión Europea (UE) na que expoñerán a súa situación e solicitarán o seu apoio para preservar os estándares educativos na rexión. Espérase que esta petición sexa enviada a próxima semana, xa que creen que é fundamental involucrar instancias superiores para que se tomen accións concretas en favor da educación dos seus fillos e fillas.