- O Programa 2020 repartirá alimentos básicos para case 1,5 millóns de beneficiarios finais
O Ministerio de Agricultura, Pesca e Alimentación, a través do Fondo Español de Garantía Agraria (FEGA), puxo en marcha o «Programa 2020 de axuda alimentaria ás persoas máis desfavorecidas», no que se repartirán, de forma gratuíta, 88.448.397 quilos de alimentos.
O Programa 2020, que supuxo a adquisición de alimentos a través dun proceso de licitación pública por máis de 87 millóns de euros, está cofinanciado nun 85 % polo Fondo de Axuda Europea para as Persoas máis Desfavorecidas (FEAD) e nun 15 % polo orzamento nacional.
Desenvolverase en tres fases, dúas delas no ano 2020 e a terceira no primeiro trimestre de 2021. Na primeira fase, que comeza agora, distribuiranse 23,03 millóns de quilos de alimentos.
A «cesta de alimentos» está formada por produtos de carácter básico e nutritivos que se entregarán en todas as provincias de España e repartiranse a través da Federación Española de Bancos de Alimentos, así como dos centros provinciais de Cruz Vermella.
Estas dúas entidades distribuirán os alimentos entre unhas 5.600 organizacións asociadas de repartición que participan no programa, de maneira que os case 1,5 millóns de beneficiarios finais poidan preparar facilmente unha comida completa para unha persoa ou para unha familia con varios membros, incluídos bebés.
As persoas desfavorecidas que aínda non estean a recibir esta axuda alimentaria e que estean interesadas en ser beneficiarias do programa poden contactar con algunha destas organizacións asociadas de repartición cuxo listaxe pode obterse na páxina web do FEGA.