Alemaña inaugurou este sábado a súa primeira terminal flotante de Gas Natural Licuado (GNL), tras a chegada ao porto de Wilhelmshaven do buque “Hoegh Esperanza” procedente de España e dentro da estratexia da primeira potencia europea para cortar a súa dependencia do gas ruso. O chanceler Olaf Scholz, o seu ministro de Economía e Protección do Clima, Robert Habeck, e o de Finanzas, Christian Lindner, así como o xefe do goberno rexional de Baixa Sajonia, Stephan Weil, presidiron a apertura formal da terminal, a uns 3 graos baixo cero e no medio dunha xélida néboa.
“É a primeira das cinco terminais de GNL previstas para substituír o gas ruso e garantir que ningún fogar queda sen subministración”, destacou Scholz, nunha breve declaración. “Construímolo nun tempo récord, expoñente do novo ‘ritmo alemán’ na toma e execución de decisións”, engadiu. A expectación mediática era máis que notable. Tamén o foi o despregamento policial, ante as críticas de organizacións ambientais contra a instalación desa infraestrutura, á que seguirán outras catro terminais en distintos puntos do litoral norte e báltico alemán.