De récord. Así pode cualificarse a edición de 2025 do Trail de Lousame, o máis concorrido da súa historia con 512 atletas, un 19% máis ca na edición anterior. A maiores, a proba curta foi tamén a máis concorrida destas nove edicións, con 338 participantes xa que a organización viuse obrigada a autorizar 50 prazas adicionais para dar resposta á demanda por parte de atletas de toda Galicia. E o terceiro récord caeu da man do gañador absoluto da proba: Alexandre Otero Iglesias, que non só lle arrebatou a Elpidio Gómez o récord que posuía dende 2021 (2 horas 1 minuto e 41 segundos) senón que se converteu no primeiro atleta en baixar das dúas horas no Trail de Lousame.
O tempo acompañou, o que facilitou o récord de participación. Iso si, a saída do Trail Longo das 10:00 horas tivo lugar a cero grados, o que fixo que todos os atletas sen excepción elixiran o interior do polideportivo Pilar Barreiro Senra para facer os seus exercicios de quencemento. Segundo foi pasando a xornada, o sol comezou a brilar e a temperatura quedou nuns agradables 16 graos. O alcalde de Lousame, Esteban Ares García, foi o encargado de dar a saída das dúas probas, agradecendo tanto a participación dos atletas presentes como poñendo en valor o traballo dos técnicos municipais e dos máis de sesenta voluntarios e voluntarias que se encargaron de que todo se desenvolvera sen incidencias.
A proba foi a primeira organizada en colaboración coa Federación Galega de Atletismo, polo que os participantes acadaron os derradeiros puntos do ano para o circuíto Galicia Trail Running Series. Unha puntuación que pechará as clasificacións oficiais de finais de ano e que serán recollidas na Gala Anual da Federación.
Trail longo
Alexandre Otero (Sociedade Deportiva Barbantia Roda) fixo bos os prognósticos e venceu en Lousame cunha autoridade abrumadora e parando o crono nuns incribles 1 hora 57 minutos e 28 segundos que pillaron descolocados a máis de unha persoa do público, que non agardaban tal fazaña. De feito, o actual campión galego de Carreira por Montaña entrou na meta en solitario e con pouco público aplaudíndolle. “Fomos todos xuntos ata a Muralla e aló comezou o embudo. Escapei aló, baixando o cortalumes e pouco a pouco ata a meta”, declarou un Alexandre Otero, cunha tranquilidade que para nada semellaba ter rematado de percorrer 25 quilómetros con 1.140 metros de desnivel. Esta é a súa segunda vitoria no Trail de Lousame, despois da acadada en 2022 cun tempo de 2 horas 7 minutos e 38 segundos. Hoxe rebaixou en 10 minutos e 10 segundos esa marca.
O extraordinario tempo de Alexandre Otero sorprende aínda máis se se ten en conta que o segundo clasificado e gañador da edición de 2024, Damián González Castro (Boiro), marcou 2 horas 1 minuto e 17 segundos. É dicir, rebaixou en 24 segundos o récord establecido en 2021 por Elpidio Gómez. Incluso o terceiro clasificado, Federico Losada Conde (Club Deportivo Biosbardos) estivo a piques de rebaixalo, pois parou o crono en 2 horas 1 minuto e 47 segundos. De feito, ata o récord de Elipio Gómez, ninguén baixara das 2 horas e 6 minutos en Lousame. Hoxe o seis primeiros clasificados rebaixaron ese tempo, o que dá tamén unha idea do nivel dos atletas participantes e do extraordinario ritmo da proba.
Unha rapidez que non se repetiu na proba feminina, moito máis lenta ca en edicións anteriores. A vitoria foi para Bea Barroso Pérez (Club Atletismo Noia) cun tempo de 2 horas 37 minutos e 48 segundos e no posto 50 da xeral. Deste xeito, a atleta noiesa mellora o segundo posto do Trail Curto de 2023. Completaron o podio Lucía Peón Santomé (Atletismo Arenteiro. Lalín) e Shirley Carolina Garcés Soto (Traileros Toxos&Birras), cuns tempos de 2 horas 39 minutos e 20 segundos e 2 horas 42 minutos e 20 segundos.
Trail curto
Onde ninguén repetiu triunfo foi no Trail Curto, onde destacou a ausencia do nicrariense Rubén Martínez Mayo, gañador nas cinco edicións nas que participou e campión das dúas últimas. Iso si, o seu récord non foi batido este ano, nunha proba dominada por Adrián Sesar Míguez (Club Atletismo Santiago), quen cruzou a meta cun tempo de 1 hora 7 minutos e 17 segundos. Maxi Oubiña Falcón (Club Atletismo Cambados) subiu un peldaño do podio con respecto a 2024, entrando en segunda posición cun tempo de 1 hora 7 minutos e 52 minutos. Completou o podio o padronés David Seage Danza, que cruzou a meta cun tempo de 1 hora 9 minutos e 27 segundos.
Na categoría feminina a vitoria foi para Julia Salvado Diéguez (Sociedade Deportiva Compostela Atletismo), cun tempo de 1 hora 22 minutos e 47 segundos. Apenas 19 segundos despois entraba en meta a teense Carmen Rodríguez Villaverde; mentres que o terceiro posto foi para a pontevedresa Nerea Castro Nogueira, que entrou da man da súa irmá María Saleta Castro Nogueira, marcando un tempo de 1 hora 24 minutos e 32 segundos.
Entrega de premios
Os premios foron entregados pola tenente de alcalde, Silvia Agrafojo; a concelleira de Deportes, Mariel Agrafojo Nieto; o concelleiro de Seguridade Viaria, José Antonio Ces Barreiro; e Pablo Roo, xerente de Futuránea, empresa local e patrocinador principal do Trail de Lousame 2025.
Ademais dos trofeos aos 3 primeiros clasificados, masculinos e femininos, de cada Trail, tamén se entregaron distincións aos mellores clasificados locais: Elena Torea Torea (Club Atletismo Lousame) e Manuel Gómez Gómez no Trail Longo; e Fran Oviedo Bouzas (Club Atletismo Noia) e Andrea Gómez Tubío. Elena e Fran repiten distinción por terceiro ano consecutivo. O premio ao club máis numeroso foi novamente para o Tribu Trail, despois de que na edición pasada fora superado por primeira vez polo Traileros Toxos & Birras.
Antes da entrega de premios, as persoas presentes compartiron unha ración de lentellas e uns choripáns, acompañados de froita variada, auga e bebidas enerxéticas. Dende o Concello de Lousame agradecen especialmente a colaboración dos máis de sesenta voluntarios e voluntarias, sen cuxa axuda non tería sido posible o desenvolvemento da proba. Un agradecemento extensible a: Cruz Roja Noia e Protección Civil de Lousame.
O Trail de Lousame está organizado polo Concello de Lousame, en colaboración coa Secretaría Xeral para o Deporte, a Deputación Provincial da Coruña, a Xefatura Provincial de Tráfico e a Federación Galega de Atletismo. Conta co patrocinio de Futuranea, Hoka One One, Tarrío & Suárez Obras e Contratas, Gadis, Horban Hormigones; Fermín Simal SL, Atmósfera Sport, Alqui Noia e Construmarc Obras.