A multinacional estadounidense presentou a súa última versión da liña de altofalantes intelixentes Echo, que este ano promete maior velocidade de resposta. Nun evento dixital por mor da pandemia de COVID-19, a firma de Seattle (estado de Washington, EEUU) mostrou por primeira vez os novos altofalantes, que custan 99,99 dólares e están dispoñibles en negro, branco e azul xa mesmo. A maior velocidade de resposta lógrase, segundo explicaron desde Amazon, mediante un novo módulo de recoñecemento de voz dentro do propio dispositivo chamado AZ1 Neural Edge, que permite ao asistente de voz Alexa procesar as ordes in situ mediante intelixencia artificial antes de trasladalas á nube.
Alexa tamén foi obxecto de actualizacións significativas, que inclúen melloras na súa capacidade de resposta ás ordes recibidas cando hai varias persoas falando á vez e avances cara a un son máis natural mediante a modulación do ton de voz. En canto aos produtos de seguridade, a firma que dirixe Jeff Bezos introduciu unha cámara de vixilancia bautizada como Always Home Cam que vai instalada sobre un dron autónomo que voa por dentro da casa de habitación en habitación para rexistrar e mostrar imaxes de cada recuncho do fogar. Este curioso dispositivo, pensado por exemplo para poder vixiar todas as habitacións remotamente cando non se está na casa, custará 249,99 dólares cando salla ao mercado o próximo ano, e recárgase de forma autónoma regresando á súa posición orixinal cada vez que termina a súa rolda. Outras das novidades en seguridade foron unha serie de produtos pensados para evitar roubos nos automóbiles, que inclúen unha alarma -Car Alarm-, unha cámara de videovixilancia -Car Cam- e Car Connect, un sistema que permite conectar a cámara xa incluída no coche (no caso de que a haxa) coa rede de vixilancia de Amazon.