A secretaria xeral da Amnistía Internacional, Agnés Callamard, anunciou este venres en Kiev os resultados extraídos da investigación levada a cabo pola súa delegación, e as conclusións son claras: Rusia debe responder ante a xustiza internacional por varios crimes de guerra cometidos no nordés da capital. O informe de Amnistía Internacional fai especial fincapé na rendición de contas, recalcando que «todos os responsables, incluíndo a cadea de mando, deben ser levados ante a Xustiza».
A investigación aúna decenas de entrevistas a testemuñas e achega tamén unha análise de probas materiais. Ataques aéreos ilexítimos, execucións extraxudiciais e homicidios deliberados de civís son outros dos datos documentados no informe.
Durante 12 días os investigadores de Amnistía Internacional entrevistaron a 45 persoas que presenciaron ou coñeceron de primeira man os asasinatos ilegais dos seus familiares e veciños a mans de soldados rusos, e a outras 39 que presenciaron ou coñeceron de primeira man os ataques aéreos que tiveron como obxectivo oito edificios residenciais. O resultado final, un informe tan demoledor como desolador.