A portavoz nacional do BNG, Ana Pontón, insistiu nun gran acordo de país consensuado no Parlamento entre Goberno, forzas políticas, axentes sociais e todos os sectores capaces de aportar propostas para a recuperación económica e social de Galiza porque, ao lado da repercusión sanitarias da pandemia, hai outras consecuencias de extrema gravidade no ámbito económico e laboral que baten de cheo na vida das persoas.
Ese necesario acordo debe incluír un programa de reactivación económica no que o BNG xa está traballando a través da comisión de expertos creada fai un mes, programa en base a cinco principios: sector público reforzado e potente que actúe como motor de creación de emprego e de garantía de xustiza social, – “non podemos volver caer no erro de rescatar á banca”-; impulsar o tecido produtivo; aposta estratéxica pola ciencia de base, pola investigación e polo coñecemento; fortalecer os servizos públicos, -superar o modelo que mercantiliza os coidados-, e estratexia contra o cambio climático.
En relación á desescalada, o Bloque considera clave que debe estar adaptada á nosa realidade e que debe ser segura.