O vicepresidente económico e conselleiro de Economía, Empresa e Innovación, Francisco Conde, trasladou todo o apoio da Xunta ás seis empresas afectadas polo incendio do pasado domingo no polígono do Rebullón para que poidan recuperar canto antes a súa actividade.
Nunha xuntanza cos seus propietarios, precisou que, neste momento, están facendo balance dos danos para cuantificar perdas e, nalgúns casos, valorar posibles localizacións provisionais. Son empresas do sector do transporte e a loxística, o comercio e distribución téxtil e de servizos nas que se estima que traballan preto de 200 persoas.
Segundo avanzou, constituíuse un grupo de traballo entre a Xunta, a Asociación de Empresarios de Mos, o Concello e as empresas afectadas para ir “identificando e salvando” cada unha das necesidades que se lles presenten. “Haberá unha implicación desde o punto de vista da axilización administrativa por parte do Concello e da Xunta”, avanzou Conde, quen tamén comprometeu axudas para as empresas que precisen financiamento cunha bonificación da taxa de interese ou para apoiar investimentos.