Un vehículo resultou completamente calcinado despois de bater contra un muro na AC-544, na parroquia de Portor, en Negreira.
Como consecuencia do impacto, o condutor, que saíu polos seus propios medios do vehículo, sufriu diversas lesións, das que foi atendido no centro hospitalario da localidade.
Os feitos ocorreron ás 00:30 horas desta madrugada, tal e como indicou a persoa que chamou ao 112 Galicia para informar dun condutor ferido e tendido na vía a causa dunha colisión. Igualmente, engadiu que o coche estaba ardendo, polo que, ademais dos profesionais de Urxencias Sanitarias de Galicia-061, era necesaria a intervención dos bombeiros. Deste xeito, os xestores do 112 Galicia pediron a colaboración dos efectivos do parque comarcal de Santa Comba, así como dos membros do GES de Brión.
Así, os equipos colaboraron na extinción do lume, aínda que os danos no vehículo son irreparables, pois resultou completamente calcinado.
Pola súa parte, o servizo médico de urxencia ocupouse do traslado do ferido ao centro médico, e o persoal de mantemento da vía, neste caso da Axencia Galega de Infraestruturas, participaron na limpeza da calzada e no restablecemento das condicións de seguridade. Debido ao incendio no vehículo, quedaron bastantes restos pegados no asfalto, o que obrigou a realizar un traballo intensivo para a súa extracción.