Un pozo de saneamento en Suevos sofre, cando hai fortes e persistentes chuvias, contínuos desbordes. O problema, que se arrastra dende hai tempo, solucionarase coa obra que actualmente executa Xestur para a nova conexión de saneamento do Polígono de Morás coa EDAR de Bens. O novo colector reforzará tamén a capacidade dese punto de auga de recollida en Suevos.
O contrato da conexión exterior do saneamento adxudicouse a finais de 2020 á empresa Copasa por un importe de 5.115.000 euros e un prazo de execución de 16 meses.
A obra consistirá na execución das actuacións para recoller e transportar as augas residuais desde o polígono de Morás ata a depuradora de Bens, en A Coruña. Construirase un sistema de colectores de augas residuais xerados no polígono para que se incorporen ao actual sistema de saneamento municipal do núcleo de Arteixo. A obra contempla a ampliación e renovación da rede de colectores ao longo de preto de 7 km.