Arteixo adxudicará en breve a estrutura necesaria para potabilizar a auga do encoro de Sabón


A nova potabilizadora e o novo depósito que permitirán potabilizar a auga do embalse de Sabón entran na súa fase final. O concurso público, repartido en dous lotes, adica 1,9 millóns de euros á infraestrutura da nova potabilizadora; e 409.000 € ao novo depósito de auga.

O obxectivo do goberno local é que a auga do Rexidoiro, que agora non é apta para consumo humano, sexa potable e asegurar, deste xeito, as necesidades futuras de abastecemento de todo o municipio. A inversión na potabilizadora ten como eixes principais a eliminación das algas presentes e a filtración de todo tipo de impurezas para o que se ensaiará un novo sistema de ultrasons, pioneiro en España. Trátase de colocar en medio do embalse uns aparatos flotantes que, a través de ultrasons, eliminan as algas en orixe.

Paralelamente a este proxecto, durante os últimos anos, traballouse na eliminación de verquidos incontrolados.

O proxecto supón tamén a construcción dun novo depósito de auga no recinto da potabilizadora, ademáis da instalación da maquinaria necesaria para asegurar o proceso de depuración da auga. As obras, unha vez adxudicadas, durarán aproximadamente un ano. Con esta inversión, tanto a poboación do municipio como as novas infraestruturas como o Porto Exterior ou o Polígono de Morás, terán garantido o consumo durante décadas.