Estas persoas forman parte da Asociación Nacional de Mulleres da Pesca (Anmupesca), que na comarca agrupa á Asociación de Mariscadoras Río Anllóns, Asociación de Redeiras O Fieital de Malpica, Asociación de Redeiras Illa da Estrela de Corme e a Asociación de Mulleres do sector pesqueiro Seo de Fisterra, quen tras dirixirse por carta aos ministerios implicados -Pesca, Traballo, Igualdade e Seguridade Social- as súas demandas non foron escoitadas e as profesionais femininas do sector da pesca atópanse abandonadas sen poder beneficiarse de ningunha das axudas convocadas. “De novo, unha vez máis se confirma que os máis vulnerables son os que peor parados saen”, destaca Rita Míguez, presidenta de Anmupesca, á vez que pon en evidencia o estado de desesperación de compañeiras mariscadoras, redeiras, percebeiras, armadoras, etc.
Despois de solicitar que se decretase o cesamento da actividade por forza maior nas actividades profesionais de marisqueo, confección de aparellos de pesca e armadoras e medidas paliativas para outras profesionais como pescantinas ou biólogas, e tras a negativa do Goberno para decretar o cesamento destas actividades, a única solución que lles expuxeron desde o Goberno de España foi a posibilidade de acollerse á acreditación do descenso do 75% dos ingresos no mes de marzo con respecto ao semestre anterior. Realizados os cálculos, case o 100% destas profesionais (mariscadoras, redeiras e outras profesionais) non poden acollerse á devandita medida dada a debilidade estrutural das profesións femininas do mar e a súa fráxil situación no sector. Esta situación as condena a non percibir axuda algunha durante este mes de marzo e cuestionan as futuras.
Cabe sinalar os baixos ingresos que perciben estas mulleres pola súa actividade, xa que na maioría dos casos non chegan ao salario mínimo interprofesional, o que non lles permite en ocasións chegar a final de mes nin garantir un mínimo aforro. A iso hai que engadir que moitas son familias monoparentais con fillos e ascendentes ao seu cargo o que acrecenta a ansiedade derivada desta situación.