A execución do Hospital Público Gran Montecelo, en Pontevedra, emprega un sistema de encofrado que aumenta nun 50% a produtividade no avance das obras. Este mecanismo posibilita lograr rendementos de 3.000 metros cadrados ao mes na execución deste proxecto estratéxico.
As obras atópanse nunha nova fase de execución, que é a construción da estrutura, polo que este sistema de encofrado innovador, en lugar do tradicional, permite un maior progreso.
O sistema que se está utilizando é o de mesas de encofrado, cuxa principal vantaxe é que o taboleiro e a estrutura inferior se montan unha soa vez e se van movendo polas plantas, xa sexa apoiados en rodas ou mediante unha carretilla elevadora.
No seu movemento horizontal vanse xerando as lousas de cada andar do edificio hospitalario e no seu desprazamento vertical elévanse ata a seguinte planta, para crear a estrutura de formigón de cada nova altura. Deste xeito, as mesas evitan gran parte dos movementos con grúas, co dobre resultado de redución dos riscos laborais e de aumento da produtividade.