A intelixencia británica sitúaas a só 25 quilómetros. A capital ucraína espera un asedio inminente tras 17 días de guerra e di estar lista para defenderse. Nunha nova mensaxe á nación desde as súas redes sociais, o presidente Zelenski reclamou un cesamento do fogo para levar axuda aos civís e mandou unha mensaxe de ánimo ás súas tropas. Tamén fixo balance das baixas no bando ruso: «As nosas forzas armadas están a facer todo o posible para privar ao inimigo de calquera desexo de continuar a guerra contra Ucraína.
As perdas das forzas rusas son enormes. A dinámica das perdas dos ocupantes no día 17 é tal que se pode dicir que é o maior golpe ao exército ruso en décadas. En ningún lugar perderon máis que durante estes días. Desde o comezo da invasión, o Grupo Táctico do Batallón 31 do inimigo perdeu capacidade de combate. Os militares rusos réndense non un por un, senón en grupos enteiros», celebrou Zelensky.
Os ataques continúan en zonas nas que Ucraína seguiu tentando este sábado evacuar á poboación e levar axuda a través de «corredores humanitarios». No sur, Rusia alcanzou varios hospitais en Mykolaiv e atacou unha mesquita en Mariúpol na que se refuxiaron 80 civís, segundo denunciou Ucraína. A cidade asediada carece de electricidade, auga potable e medicamentos desde fai máis dunha semana.