- Habilitaranse dous puntos de asesoramento durante as fins de semana: no Centro de Iniciativas Empresarias de Camariñas e no local social da Ponte do Porto
Ante a alarmante subida do prezo da electricidade, que este xoves descende un 21,8% ata situarse nos 396,75 euros /MWh segundo datos do Operador do Mercado Ibérico da Electricidade (OMIE), o Concello de Camariñas anunciou que durante as fins de semana do mes de marzo habilitaranse dous postos de asesoramento enerxético para a veciñanza co obxectivo de «axudar a mitigar as graves consecuencias» do incremento da factura da luz durante os próximos meses.
Este servizo ofrecerase os sábados no Centro de Iniciativas Empresarias de Camariñas, de 9 a 19 horas, e os domingos no local social da Ponte do Porto, no mesmo horario.
As persoas que acudan deberán levar a última factura e ofreceráselles asesoramento enerxético gratuíto que inclúe: a análise do servizo contratado e a valoración de alternativas para baixar o importe a curto e medio prazo.