Dúas mochilas cargadas con cocaína apareceron este domingo no interior dun buque carboeiro que estaba atracado no porto exterior de Ferrol. O achado produciuse despois de que operarios do barco advertiran a presenza dun estraño sobre unha cuberta. Ao velos fuxiu, o que desatou todas as sospeitas e fixo que avisaran as autoridades. Unha vez a bordo, axentes de fronteiras da Garda Civil, realizaron unha inspección do barco. E nunha das adegas onde se transportaba o carbón, agochadas entre o mineral, detectaron a presenza das dúas mochilas. Unha vez examinadas detectaron no seu interior un contido compatible con algunha substancia estupefaciente. As sospeitas confirmáronse pouco despois, tras aplicaren a proba do drogotest, que deu un resultado positivo. Á espera da súa pesada oficial, calcúlase que portaban conxuntamente uns 21 quilos de cocaína.
0