- A vítima, de sesenta anos, saíra a pescar o domingo moi cedo e non regresara á súa casa
Un veciño de Lalín que saíra a pescar na zona do río Miño, en Ourense, foi atopado na mañá deste luns aboiando na zona fluvial próxima á depuradora da parroquia ourensán de Reza.
Un familiar da vítima, de sesenta anos, foi quen deu a voz de alarma durante a madrugada deste luns. No seu relato ao 112 Galicia, a persoa explicou que o home saíra a pescar moi cedo na mañá do domingo e non regresara a casa.
Desde o Centro Integrado de Atención ás Emerxencias de Galicia (CIAE) púxose a situación en coñecemento dos axentes da Policía Local e Nacional, ademais de pasar aviso aos profesionais de Urxencias Sanitarias de Galicia-061.
O cadáver foi atopado ás 08:00 horas no río Miño e para realizar o rescate do corpo e confirmar a identidade do varón, desde o CIAE solicitouse a intervención dos Bombeiros de Ourense e das forzas da orde.