Alexander Lukashenko ve como a presión internacional cara á súa persoa e o seu Goberno aumenta co paso das horas tras a polémica aterraxe forzada en Minsk dun voo de Ryanair, que concluíu coas detencións do opositor bielorruso Román Protasevich e a súa acompañante Sofia Sapega.
Á decisión de varias aerolíneas, tras a recomendación de Bruxelas, de non sobrevoar desde agora espazo aéreo bielorruso, súmase tamén a prohibición aos avións deste país de sobrevoar espazo aéreo comunitario, medida á que suman tamén Reino Unido e Ucraína. A oposición liderada pola exiliada Svetlana Tijanóvskaya pedía este martes á comunidade internacional un paso máis na súa implicación fronte ao réxime de Bielorrusia, lembrando, como se puido ver o domingo, que non só os cidadáns deste país están en perigo.
Este martes vía a luz a transcrición da conversación entre o piloto do aparello e a torre de control de Minsk. Nela queda claro, tras a insistencia do comandante, que é Minsk e non Atenas nin Vilna a que recomenda aterrar o avión en Bielorrusia. Todo iso tras asegurar ao piloto que os seus servizos especiais tiñan a información de que había unha bomba no avión que podía ser activada desde Vilna, sen dar máis detalles de onde procedía dita información.
Desde Rusia, seguen optando pola prudencia e acusan á Unión Europea de estar a tomar «decisións precipitadas e moi custosas» coas súas sancións. Moscova segue opinando que Minsk actuou adecuadamente tendo en conta que había unha ameaza de bomba. A través do seu ministro de Exteriores Serguéi Lavrov, o Kremlin asegura estar totalmente a favor de levar a cabo as investigacións necesarias para chegar ao fondo dun asunto que para a maioría está bastante claro.