Francia e Reino Unido volven pelexar pola pesca. Segundo o acordo comercial do Brexit, a UE e o Reino Unido acordaron que os barcos que pescaran nas augas do outro durante anos recibirían licenzas para seguir facéndoo. Pero a falta de acordo sobre que tipo de probas son necesarias provocou a ira de Francia.
O Reino Unido e a illa de Jersei rexeitaron as solicitudes para que os barcos franceses pesquen na área das Illas da Canle. A pesca representa só o 0,1% da economía do Reino Unido e tan só o 0,06% da francesa. Esta nova disputa podería precipitar unha guerra comercial e empeorar a relación entre a UE e o Reino Unido tras o Brexit. O profesor de Políticas Europeas do King’s College de Londres, Anand Menon, insiste en que, en realidade, ningunha das dúas partes quere que haxa unha guerra comercial, pero que sempre pode ocorrer un imprevisto.
Francia está a presionar á UE para que dea unha resposta contundente. Ademais, está prevista unha reunión este mes sobre o comercio entre a UE e o Reino Unido. A disputa podería ter efectos noutras cuestións delicadas do Brexit, como o Protocolo de Irlanda do Norte.