Avanzan as obras de mellora da rede viaria de Soandres na Laracha


Xa están en marcha as obras de mellora da estrada municipal da parroquia de Soandres que comunica os núcleos de Vilanova, Saldante e Samir e remata na vía local A Laracha-Cerceda. Trátase dunha das estradas máis concorridas da parroquia por pasar xunto ao cemiterio e estar próxima ao mosteiro de San Pedro. Ten unha distancia de 2,5 quilómetros e unha anchura variable dun mínimo de 4,75 metros e un máximo de 6 metros. Esa superficie está a ser dotada cun novo pavimento de aglomerado asfáltico en quente. Contémplanse, tamén, a sinalización e a limpeza das cunetas e caños.
A actuación estase a desenvolver en dúas fases. Xa se levou a cabo a pavimentación do primeiro tramo que vai desde Vilanova ata o cemiterio.
O proxecto está a ser executado por Construcciones López Cao S.L. Está valorado en 91.000 euros e é cofinanciado entre o Concello da Laracha e a Consellería do Medio Rural ao estar subvencionado pola Axencia Galega de Desenvolvemento Rural (Agader) no marco do Plan de mellora de camiños municipais 2019-2020.