- A pesar dos problemas de desabastecemento de material sufridos nos últimos meses, en breve comezará a construción dos columbarios
O alcalde de Carballo, Evencio Ferrero, realizou este martes unha nova visita ao cemiterio municipal para comprobar a evolución das obras de ampliación que se están a levar a cabo, afectadas nos últimos meses polos problemas de desabastecemento no sector da construción. Estes días estase procedendo á colocación das cubertas dos novos panteóns, que están moi avanzados, e de seguido iniciarase a construción dos columbarios.
Nesta primeira fase de ampliación, que está a executar a empresa Vázquez y Reino cun orzamento de 647.000 euros, construiranse 720 nichos e 96 columbarios. Sen embargo, o proxecto completo seguirase desenvolvendo nos vindeiros anos para «dar resposta á gran demanda existente», afirman desde o Concello. Construiranse nove bloques de niños, dous deles dando continuidade a panteóns xa existentes e o resto coma bloques illados, ademais de cinco de columbarios. Tanto nun caso coma noutro, a disposición dos nichos será en catro alturas e os acabados en pedra natural, mantendo o modelo actual. En total está prevista a construción de 456 panteóns con 1.824 nichos e de 256 columbarios distribuídos en 64 columnas.
Así mesmo, en cumprimento da lexislación autonómica sobre sanidade mortuoria, nesta primeira fase procederase á instalación dun forno incinerador para a eliminación de roupas, útiles, madeiras e demais residuos procedentes da evacuación e limpeza de sepulturas ou do propio cemiterio. A intervención complétase coa urbanización da contorna, mediante a pavimentación das rúas que comunican os bloques de nichos e columbarios, a instalación de bancos, luminarias, papeleiras e billas.