Proseguen os traballos na mellora e modernización do regadío da Limia, coa perforación dos 40 novos pozos que completarán a rede desta bisbarra ourensá. Así, o conselleiro do Medio Rural, José González, supervisou as obras de tres pozos e avanzou que o orzamento total que se vai investir neles ascende a case 6 millóns de euros, contando as obras de bombeo e electrificación. Un xa está finalizado, outro está en perforación e, no terceiro, están a comezar cos traballos relativos ao ensaio dos bombeos e ao seu control hidrolóxico para o correcto dimensionamento dos grupos de bombeo. Desta maneira, obterase o caudal exacto de cada pozo, o que resulta fundamental para deseñar a futura rede de regadíos. Paralelamente, estanse a realizar os traballos de acondicionamento dos terreos onde se emprazan e prevese que a finais de febreiro estean os 40 pozos aforados, é dicir, co caudal exacto determinado para cada un deles.
37