En tres días formalizáronse 114 operacións de venda, un 60 % máis ca no ano 2024. O parque de vehículos expostos incrementouse tamén de maneira notable: dos 370 coches do ano pasado pasouse a preto de 500 nesta edición.
O espazo feiral ampliouse, incorporando a zona da Biblioteca Rego da Balsa, o que permitiu mellorar a capacidade expositiva e dar resposta ao crecemento de participación. Neste sentido, 18 concesionarios estiveron presentes, fronte aos 13 do ano anterior, marcando un novo máximo histórico de expositores.
O prezo medio dos vehículos vendidos situouse arredor dos 18.000 euros, o que se traduce nun volume de facturación superior aos 2 millóns de euros. Este resultado acadouse en apenas tres xornadas e con parte das operacións realizadas con compradores de fóra da provincia, evidenciando o peso crecente da feira no mercado galego.
O balance global confirma que, malia á choiva que acompañou parte da fin de semana, Berocasión 2025 foi a edición máis exitosa da súa traxectoria recente, tanto en vendas como en participación, e reforza o papel de Carballo como zona estratéxica para o comercio do automóbil.