O novo delegado do Goberno en Galicia, José Ramón Gómez Besteiro, situou este luns a «xustiza» no centro da actividade que desenvolverá na súa restitución como cargo público tras estar lonxe da política desde 2016. Gómez Besteiro prometeu o cargo en galego sobre o artigo 14 da Constitución, que versa sobre a igualdade dos españois.
Tras as súas primeiras palabras dedicadas ás familias de Ribadeo, que perderon a catro mozos no accidente ocorrido o sábado, Besteiro agradeceu a confianza que nel deposita Pedro Sánchez. Dixo que se trata dun Goberno que, na súa opinión, «marca a historia de España por dúas condicións sobresalientes»: «a capacidade innegable para afrontar as crises (…) e a imbatible determinación para facer prevalecer os intereses da maioría».
Así, o novo delegado do Goberno dixo que traballará seguindo esas liñas marcadas polo Executivo: os da xustiza social, económica e ecolóxica, e destacaba Besteiro a palabra «xustiza», «cun importante significado para min», afirmou. O novo delegado do Goberno reivindicou a política polo seu valor e tendeu «a man» ao presidente da Xunta, Alfonso Rueda, que presidiu o acto.
Fóra da política desde 2016, Gómez Besteiro hoxe volveu a ocupar un cargo público despois de ver arquivadas as súas dez imputacións. «Por unha decisión libre e responsable hoxe estou de novo na política», concluíu Gómez Besteiro, explicando que «non cheguei a aquí só. Débollo a familia, o partido e o sentido do humor».
O presidente da Xunta, Alfonso Rueda, como «representante ordinario do Estado en Galicia», demandou ao novo delegado que sexa «un transmisor» dos intereses e necesidades desde a comunidade ao Executivo.