Biden asina a lei de matrimonio homosexual nunha cerimonia na Casa Branca. Con esta lei o presidente de Estados Unidos blíndao a nivel federal no caso de que o Tribunal Supremo, de maioría conservadora, revogue os fallos xudiciais que protexen eses dereitos. Queren evitar que pase o mesmo que co dereito ao aborto, que o Tribunal Supremo tombou este verán.
Na cerimonia interviñeron os líderes demócratas do Congreso, Chuck Schumer e Nancy Pelosi, que recoñeceron o traballo que os activistas de EE.UU. fixeron para cambiar a opinión pública en torno ao matrimonio igualitario e conseguir que sexa protexido por lei.
A opinión pública de EE.UU. cambiou de maneira vertixinosa nos últimos anos: en 1996, cando se asinou a lei que establecía que o matrimonio era a unión entre un home e unha muller, só o 27 % dos estadounidenses apoiaba o matrimonio homosexual, mentres que en 2022 o apoio era do 71 % , segundo Gallup.