O primeiro ministro británico, Boris Johnson, abandonou este xoves a unidade de coidados intensivos e continuará ingresado na planta do hospital St Thomas de Londres, onde se recupera tras desenvolver COVID-19. Un portavoz de Downing Street, o seu despacho oficial, subliñou que o xefe do Goberno mantén un «ánimo extremadamente bo» e continuará sendo «monitorado de preto» polos médicos. Johnson, de 55 anos, pasou tres noites na unidade de críticos, onde foi trasladado o luns, un día despois do seu ingreso con síntomas «persistentes» do novo coronavirus.
O seu portavoz oficial detallou que se atopa na «fase temperá da súa recuperación», despois de confirmar esta mañá que a súa saúde continuaba mellorando. O primeiro ministro, que recibiu tratamento con osíxeno pero non chegou a requirir ventilación mecánica, comezou este mércores a incorporarse na cama e «interactuar» co seu equipo médico, o que incrementou o optimismo sobre o seu estado. Johnson, que deu positivo por COVID-19 o pasado 27 de marzo, deixou temporalmente as rendas do Goberno en mans do seu ministro de Exteriores, Dominic Raab.